Apré, zot ké chigné konmkwa tout pep asou latè ka tiré méprizasion ba zot !

     Pa ni yon jou éti ou pa ka wè an Antiyé oben an Afritjen ka plenn kò'y ki tout pep asou latè rayi Neg.

     Sé an sel chigné (pleurnicherie) ki pa ka bout toubannman ! Kisiswa laradio, latélé, adan jounal oben asou rézo sosial, toujou ni an Neg ka vréyé vokal pou sa dénonsé sa. Lè yo pa ka ripwoché Blan konpowtasion-yo kivédi rayisans (haine), sé Arab, Zendien oben Chinwa yo ka akizé di tiré méprizasion ba yo. 

      Men, janmen-a yo pa ka mandé kò-yo es yo pa ni tjek reskonsabilité adan sa !

      Sa red ek sa tris pou di, men ni tibwen twop Neg ki ka fè makakri oben ka fouté vakabonnajri. Sa pa té ké sitelman grav si zot wè Entènet pa té ka ekzisté mé, jòdi-jou, nenpot moun ki ka viv an Mongoli pé wè sa tout pep ka fè. Yo ka wè vidéo tout lasent-jounen ek, pli souvan ki rarman, sa yo ka wè sé sèten chantè neg ek soutou chantez ka anni mété lapo bonda-yo déwò oben ka fè wol yo ka koké douvan an piblik, li-menm neg, ki kontan kité kontan ka alé kon nou pé wè'y asou vidéo-a ki pli ba artik-tala.

      Sé pa pies kalté model lamoral nou lé fè ba pèsonn. Sa nou lé di a sé ki an moun pé fè sa i lé dépi sé andidan kay-li i ka fè'y, men lè i douvan an piblik, i pou véyé kò'y davwè (parce que) i plis ki sav ni an siwawa (multitude) téléfòn powtab ké filmé'y. Ek, jou landimen-an, sé vidéo-a ké fè kous-kouri toupatou, anlè tout rézo sosial ek pli mové ankò, nan tout lankongni (coin) linivè ! 

     Jenn ti masoukrel-la (fille délurée) ki anlè vidéo-tala es i pa ni manman ? Es i pa ni papa ? Lè zot wè i ké chaché an travay i pa sav vidéo-tala pé opozé'y trapé yonn ?