Asiparé fanm-lan té ka kònen'y !

      An kréyol, "kònen" ni dé védi (sens/meaning) : 1) pijé anlè kòn an loto ; 2) koké épi an moun ki pa mari'w oben madanm-mayé'w. 

      Enben, lot jou-a, an Gwada, sé dé védi-tala, ki dabitid toutafetman diféran, anni fè yonn toubannman. Jété an zié asou foto-a ka ilistré artik-la ek zot ké konpwann lamenm ! Zot ka wè an boug ka sispann adan powtiè an loto ki ka woulé. Misié pa lé ladjé mòdan mé moun-lan ki ka mennen loto-a pa lé rété non pli ! 

      Sa sa yé sa !

      Asiparé, sé an boug ki dékouvè ki fanm-li té ka ba'y kòn. Silon an lot dékatman moun-la ki té ka mennen loto-a sé kokè-a, tala ki pwan madanm boug-la ki sispann adan powtiè loto-a.

      Kisiswa sa ki séré dèyè bililik-tala, sa boug-tala fè a té danjéré kité danjéré ka alé davwè (parce que/because) an lè, i té blijé ladjé powtiè-a ek i fouté tjou'y atè anlè luiloud-la (asphalte/asphalt road) ek nenpot loto ki té ka vini dèyè té ké pé dépotjolé'y. 

      Zot ka gadé twop feyton latélé, lézom !