Boneiru a partisipá na konferensia di SIDS4

Un paso importante pa Boneiru ta rekuperashon i fortifikashon di e sistema natural.

Diputado Anjelica Cicilia, huntu ku sra. Johanna Garming (e persona enkargá ku maneho riba tereno di medio ambiente i e studiante Noah Hassan tabata na Antigua i Barbuda pa partisipá na e di kuater konferensia internashonal di Small Island Development States (SIDS4). E konferensia aki ku Nashonnan Uní ta organisá ta tuma lugá kada 10 aña i ta hunga un ròl importante den kaso di inisiativanan manera e Akuerdo di Paris di 2015.

Enfoke riba adaptashon di klima

E konferensia a trata tópikonan importante manera kambio di klima, pèrdida di biodiversidat, konservashon di oséano, redukshon di riesgo di desaster i akseso na finansiamentu. Pa Boneiru e enfoke tabata riba adaptashon di klima.

Konosementu nobo pa Boneiru

Partisipashon na e diferente seshonnan i diskushonnan den foro a sòru pa hopi idea nobo.  ‘Pensa por ehempel riba reuso di sargassum komo fertilisante òf biokombustibel. Ta importante tambe pa hasi nos áreanan di palu di mangel mas grandi, mirando ku esakinan ta fortifiká liña di nos kosta i ta apsorbé hopi dióksido di karbon - CO2,’ segun diputado Cicilia.

Pasonan práktiko pa Boneiru

Un paso importante pa Boneiru ta rekuperashon i fortifikashon di e sistema natural pa den futuro redusí impakto riba medio ambiente i pa oumentá resiliensia kontra inundashon. Esaki ta enserá:

• Revitalisá saliña, dam i roi pa oumentá e kapasidat pa almasená awa.
• Añadímas vegetashon pa mas kapasidat di retenshon.
• Rekuperá i mantené infrastruktura.

E medidanan aki ta krea mas oportunidat pa agrikultura i siguridat di kuminda, nan ta mehorá alimentashon i nan ta kontribuí pa baha kosto di bida.

Representante hóben

E studiante Noah Hassan a representá hóbennan di Boneiru durante e SIDS4. ‘Mi ta orguyoso ku mi por a representá Boneiru su hóbennan. E konseho ku nos komo hóben a duna, ta bira e núkleo di e Center of Exellence – Sentro di Ekselensia nobo,’ segun Noah. El a haña e oportunidat aki di entidat públiko Boneiru, pa motibu ku el a gana e debate hubenil ku su tim. Diputado Cicilia a enfatisá: ‘Partisipashon di hóben ta sumamente importante. Nan ta esunnan ku lo karga e konsekuensianan di nos akshonnan. Nan aporte krítiko ta esensial.’