Jounalis Matinik ka kriyé sa "rodeos" atjelman aloski nou toujou kriyé sa "tiraj" adan zépon natirel nou kivédi kréyol. Sé pa jòdi-jou moun ka fè tiraj adan ti tet zépeng péyi-nou an, mé antan lontan, sé té plis tiraj loto.
Jòdi-jou, sé plis tiraj moto ka terbolizé moun lannuit kon lajounen ek an plis di sa, ka blésé oben ka tjwé ki sé vakabon-an ki anlè sé moto-a ki moun ki pa ni ayen pou wè épi sa, moun ka pasé asou bòdaj lawout-la. Sé kon sa mwa pasé, an jenn madanm ped dé janm-li asou boulva Maurice Bishop palakoz an chien-fè ki konyen'y ek fouté'y atè. Lapolis poko janmen rivé trapé misié jik aprézan !
Ki manniè pou koré sé tiraj-tala ?
Sé an keksion ka bat lespri moun ka viv Senn-Térez dépi omwens 5 lanné. Lè sé vakabon-an ka woulé a 120 oben 150 tjilomet a lè ek yo ka ped gidonnaj moto-yo, sé asou moun ka viv la yo ka fè tan chalviré. Bagay-tala pé pa kontinié kon sa ankò. SA PA POSIB ! Nou tout la ka chonjé lanmanniè dé sèten politisien PPM té ka flaté jenn mota ka "kabré" moto-yo. Jis té ni an chanté ki té fet asou sa ek ni vidéo ka sirkilé toujou ka montré nou sé politisien-tala ka chanté'y Pak Floral douvan santenn moun.
Kivédi olié dénonsé "kabraj", yo té ka ankourajé sé jenn-lan fè'y !
Sel solision pou mété an milié adan sa, sé mété kaméra asou tout londjè boulva Maurice Bishop la ek trapé sé kabrè-a, sézi moto-yo ek fouté lajol sé tala ki blésé moun la. Kontinié vréyé bel pawol asou "lédikasion dè lajénes", sé chayé dlo nan panyen toubannman.
- Se connecter ou s'inscrire pour publier un commentaire
- 129 vues
L'Humanité
18/11/2024 - 21:18
15/11/2024 - 13:06
11/11/2024 - 18:05
