An kalté lavi douvan-dèyè toubannman

   Adan ti tet zépeng Matinik la ou sé di lavi anni chalviré tjou-pou-tet dépi yonndé tan. Nou ka anni tounen-fol kontel topi-mabial. Konsidiré nou té anni batjé abò an chouval-bwa ki vini dekdek bon dekdek.

   Sa ki lotè bagay-tala ?

   Asiré-pa-pétet, ni anchay lespik asou sitiasion-an nou ka lolé adan'y lan men lè nou ka pwan tet-nou katjilé asou'y an manniè ki sérié, nou blijé admet ki nou tout-la, nou reskonsab li. Sé vré ki Léta fwansé ka fann fwa-nou, ki kovid-la désérébralé anlo moun nan péyi-a, ki lavi ka vini pli chè anmizi-anmizi palakoz salopté ek pwofitasion sé Bétjé-a, ki klowdékòn ek wawet ka prézonnen lekzistans-nou, ki ladwog ek kout fizi ka fè siwawa toupatou kisasayésa...

   Sa vré ! 

   Men, es nou ka pwan an ti moman tan pou jété an zié asou pwop konpowtasion-nou ? Es i pa reskonsab tou di bankoulélé-a ka soukwé Matinik la kontel an pié-chacha toubannman ? Davwè lè nou fè tan gadé kò-nou adan an miwè, nou pé pa pa rimatjé ki nou pa pli sav sa nou lé ba péyi-nou an ek ba kò-nou menm. Es nou lé rété fwansé oben es nou lé kaskod épi la Fwans ? Es nou dakò épi model lavi kapitalis-la oben es nou dakò pou goumen ba an lot sistenm ? Es nou ka défann lang-nou ek kilti-nou an manniè ki toutafetman sérié oben sé wol nou ka fè ? Es nou pa adan tjek kannaval bonmaten-an-midi-oswè ?

   Toulitan nou pé ké réponn sé keksion-tala, nou ké kon chien ki abò yol.