Biyé pa déviré

Dépi té ni an travay malonnet pou fè sé Pol Lanmen léjè yo té ka fè kriyé. Zot ja konprann si yo ba misié non-tala sé ki i té ka respekté bagay tout moun bienkonmifo. Misié alé wè an sakristen rafen. Mé pawol ka di fok pa janmen ba rafen séparé lajan. Eben jennjan-a fèmen zié’y asou an malonnèté. I asepté (lè labé-a pa té la) sonnen dé kout kloch légliz-la. Asiré anlo moun té ké kwè sé an fanm éti té valé kat didantité’y.

Lè Man Marsel tann sa i di :

• Asiré, yonn fini trapé biyé pa déviré’y !

Man Na éti té ni plis filozofi ralé asou vié pip-li a ek i di épi an vwa bien asiré :

• Man pito kwè i pran randévou ek Bazil, ki chayé’y alé.

Ton Pol (kidonk tonton Pol Lanmen léjè) an boug éti pa té ka djè palé, i té rayi an bava dann, di pou tout moun té tann :

• Men Entel désann an gran vout-la !

Tifi Man Idelvè-a éti té enmen chanté, koumansé bay lavwa

Valantin Berlan

Si i mò téré’y

Non nou pé ké salé’y.

Valantin Berlan…

Anfen yo fè biyé lantèman, yo kouri sikilè pou di an madanm kasé pip-li. Mé lè ou bien kouté sikilè-a, tout moun té sav sé té an madanm mé enposib konnet tit-li. Tout moun té ka mandé : ki piébwa ki ped fèy-li ?

Ni an lamè ki di ba tout moun pou yo té sa tann, magré i té ni an vwa ka santi wonm ek tris kon fes moun mò :

• Si ni dis moun éti palé di moun mò-a san nonmen non lanmò pétet zot ké sav sé ki moun !

E sé la ou tann :

• Aten né !

Anlot réponn :

• I danm di lo !

Pandan yo té ka chaché anpami lé danm bèlè kiles té pasé pa may, Erenestin vansé ek i di :

• Fè manjé pa kité ba’y !

Pol-tikitak, zot sav tala ki fè le jou de pak ek i fou kon an taktak di an sitjet :

• I fini chié !

Tout an krèy moun koumansé vréyé dé mo kon ou ka vréyé fion pou fè koris, ou té ka tann :

• I alé !
• I monté an filao.
• I pasé pa may.
• I monté abolay.
• I aportaïm féri !

Sé di la ou tann :

• Man Entel Lakwa Piper !

Es sé pas sé té diziem moun an ki té palé a. Lamenm dé gwo makòsò anni paret an siel-la. Nwè koumansé fet. I té apenn sizè, nou poko té an mwa désanm, mé ou wè an sèkèy an chef pòtè. Sé pa dot ki Pol Lanmen léj épi kat kòbo ka mennen an kò. Tout moun fè sin lakwa lè yo té ka pasé.

Apré tjek tan, moun trouvé sa té drol. An kò té ka pasé épi ki senk moun selman. Yonndé jou apré yo aprann poutoutbon Manman Pol Lanmen léjè kasé pip-li. Pèsonn pa otjipé yo, lè yo tann di misié té adan an zafè kontribann wonm i té ka fè pasé adan sèkèy.

Jou lantèman-an pa té menm ni an kout kòn lanbi, ni an ti-kout kloch légliz. Yo téré manman’y kon ann endijan.

Sé pousa fok respekté mes moun mò, ou pa ka janmen konnet sa ki pé rivé. Sa ou pa sav lontan gran pasé’w

Jid 2.11.2020