DJOUBAK

Jòdi ni bannann é Odjis pa djè anvi alé an travay bétjé-a. Lot jou matant Ildèvè di Odjis « Sé pa lè ou fen pou alé chaché travay ». Sa vré Odjis té ké simié kontinié djobé, kidonk travay lè li lé, an gou’y pou i mandé sa i bizwen.

Mé an vérité, misié toujou chonjé an ti-pawol gangann-li té ka di :

• « Makak toujou di : si travay té bon, yo pé té ké péyé pou fè’y »

Ni anlo moun ka di Odjis sé an fenyan, lanmen’y plen plim. Mé sa vré misié toujou fè kon « Neg ka chaché travay épi an fizi pou i tjwé’y ». Odjis simié di :

• Man ka alé an dégra, pou man kasé tè ek dégradé !

Menmsi lotjou madanm li di’y :

• « Tè dégradé pa jaden ! « 

Odjis rété bik an bon ti-moman ek i i koumansé katjilé sa an tonton’y té di’y pa ni lontan :

• « Lapli poko menm tonbé, pié’w ja plen labou ! »

Tout lo pawol-tala mété kabech-li dan an sel chalè, pli cho lè i pran pasé dis fé. Misié rété ka katjilé lontan, i mantjé monté Kolson, mé an pawol paren’y té di’y lasimenn pasé, vini mété’y pres dekdek :

• An tan lapli té ka tonbé ou pa mété so’w plen anba goutiè, sé atjelman i ni séren ou lé i plen ?

Misié bien kabéché ek i mandé kò’y :

• Es sa ki travay, sé li ka manjé ?

Es lè nou ka di man ka alé an travay bétjé-a, es sé pa an manniè pou di yo ka fòsé moun travay dépi an tan lestravay.

Asiparé komkidiré travay ni rasin adan an mo kon « Tripalium » ki té lé di an fransé « instrument de torture », kidonk an bagay pou fè moun wouklé anba soufrans. Asiré lè nou sav gangann nou té anba jouk lestravay, apardi lè yo ka alé an dégra-yo. A moman-tala yo ni an aktivité pou kò-yo, fanmiy-yo. A lè-tala, kalté model travay-ala dan lakiltiv ka rann moun an fiè ek djok.

Adan tout lo pawol fol masibol-tala, Odjis sav « Ou pa ka travay an farin-frans pou lanmen’w sòti nwè »

Antouléka, asiré dèmen Odjis ké alé ralé latjé lion-an, pas si i pa travay, i pa manjé. Kivédi fok i alé o jouk pou djoubak.

Jid