Timanmay latit Lowen prézanté an bel ispektak alantou lestravay, yo pa ka bliyé. Mètres-lékol fè yo chonjé pli bel dat, 22 mé 1848. Yo ké ni pou rété véyatif asou périod-tala ek pou yo grandi épi an lespri konbatif.
Adan zafè chonjé-tala anlo mizisien té pa koté Ofanswa «Lapaloosa Aréna». Asiparé té ni oprochan 6000 fanatik ki té fè déplasman-an pou «Eïa Kassav». Yo té lé gloriyé sé mizisien-an.
Toupandan pa koté Lagwadloup sé té le 27 mai yo té ka matjé paj-yo pou pa bliyé labolision lestravay, ou si zot lé dat ladjoukann dit pou yo.
Adan tout zafè-tala ni an bou ki pa sa ped; i té pousuiv Jojo pou an zafè bon lésans. Erezdibonnè pou’y, yo té mandé i pa élijib ankò, mé sé jij-la pa suiv-yo. Sa fè misié ké pé fini manda’y.
Magré lapli-a anlo moun chonjé vakabonajri Klordékòn-lan ka tjwé moun épi sé tout épi tout model kansè. Yo mandé jijé sé koupab-la, mé dapré sa yo di komkidiré lajistis anvi désidé an «Non lieu» kivédi sikilé pa ni ayen a wè.
Mé sé moun-lan ki té la-a pa dakò valé sa dou kon siwo. Pas tè kontaminé pou an patjé tan ankò. Sé atjelman anlo kandida ka kom paré kò-yo pou di komva yo ké fè sisi yo ké fè sila, si yo éli dépité.
An menm balan-an, anlo moun pa ka menm chonjé ni éleksion ka vini dan tjenz jou.
Fout ni moun ka bliyé vit!
Jid
Bel poveb kréyol 662
«Pasians sé an rimed».
- Se connecter ou s'inscrire pour publier un commentaire
- 110 vues
