Los examens en basco deus escolans de Baiona qui desfidèn l’imposicion deu francés que son estats corregits

Los environ ueitanta escolans deu licèu Bernat Etxepare de Baiona qui avèvan causit de redigir en basco la lor espròva de matematicas deu bachelierat francés qu’an fin finau plan capitat, çò rapòrta Vilaweb. Maugrat las consignas de l’Acadèmia de Bordèu qui impausavan responsas exclusivament en francés, las lors copias que son estadas corregidas e presas en compte pendent la publicacion deus resultats.

Aquera decision que met fin a mantua setmana de tensions e incertitud. Abans las espròvas, lo ministre de l’educacion, Édouard Geffray, qu’avèva deishat enténer que los correctors examinarén las copias redigidas en basco, shens qu’estèsse pas balhada nada garentida oficiau. L’associacion Seaska, qui fedèra las ikastolas deu Bascoat Nòrd, que s’ei felicitada d’aquera sortida, saludant lo coratge deus escolans qui avèvan acceptat de córrer lo risc de véder los lors examens anullats. Pr’aquò, mantun candidat, cranhent de consequéncias entaus lors estudis superiors, qu’avèva totun preferit redigir en francés. Fins a la reforma Blanquer de 2019, las espròvas de matematicas e d’istòria-geografia podèvan estar corregidas en basco.

Aquera victòria que demora totun provisòria. La correccion de las copias en basco qu’ei estada acordada a títol excepcionau, mentre que la reglamentacion contunha d’impausar lo francés entà las espròvas. Seaska que demanda d’ara enlà que lo decret esperat aqueth estiu autorize oficiaument los examens en lengas minorizadas, dont l’occitan, e que las reformas previstas entà 2028 que sian avançadas a 2027 entad ua experimentacion. Aquera revendicacion que benefícia d’un larg sostien institucionau au Bascoat Nòrd, on de nombrosas collectivitats e elegits que reclaman un bachelierat pleament accessible en lenga basca.

Patxi Beltzaiz / Mediabask