MÉMORIAL WONPWEN MORNALO (Krab's Wonpwen)

Asilparé, moun Gripon-Mornalo té koumansé fout las, afòs yo tandé kritik é malpalé asi komin a yo. Yo touvé yo boufi épi sa. Kifè, yo sanblé, pou fè on gran sizé-kozé asi ti-ban. É yo diskité, yo byen babyé, yo voyé pawol yonn si lòt kon labou an kannivo...

Ou ja tou konprann ki kalté déba ki lévé, an pit a kòk a sé moun-la.

Finaaalman... 

Yo désidé yo ka kotizé, pou ranplasé vyékò-la. Wi, yo désidé résisité krab-la ki fin-bat la, an wonpwen Gripon. Silon on ti konfidans nou trapé, owa FDK-AMK (Fon Dè Konpansasyon A Moniman Krazé), sé « Krab's Wonpwen-2 » (KWP2) ki tit-jénérik komité dè pilotaj-la ba pwojé sengilyé-la sa.

Sé jis lòt-bò, an frijidè-la, on gran kabiné architèk parizyen ka fè plan é makèt, pou konstwi on ti dòm a moské an wonpwen-la, anlè tèt a nouvo krab-la. Sé pou, sianka lapli tonbé é loraj kouri-rivé, pou krab-la rété an fòm, é bien sèk. Pou zékal a'y pa janmen, janmen, janmen kòché, ni wouyé, ni mwazi, ni dégrenné, kon Krab 1-la.

Tout chofè-vwati sav sa. Krab Nenmbè-Wann la, tala ki téka fè pòz an wonpwen-la, i pouri... Afòs i wvè mizè, anba lapli é solèy, i fini an chapi, san fè pon rézistans...

Prézidan Émanyel Mak-Won é Brijit a'y, yo ja wousouvwè envitasyon a yo an men-pwòp, a Lélizé, yo pou vini an Gwadloup, prézidé bat-zyé inogiral a Gwo Touloulou 2 A'w-La... si Likrèn kalmé titak.

Yo ké èvè 2 prézidan an nou, Loko é Lokal, misyé é madanm, yonn a dwat, lòt a gòch, épi bann ofisyel KPABP - Kok é Poul A Bèl Poz an nou, o gran konplè, ďébardè Kenzo pou nonm, wòb bwodé long a Devaed pou Madanm. Kivlédi osi, ké tini détwa bon ti diskou, san lang-dè-bwa, pou rann kristasé-simityè sirik andémik-la tout omaj a'y, byen kòmilfo. Pap-la, wi, Pap Fanswa, li é tout labé a'y - jenn kon vyé, sa ki mò, sa ki ja résisité... yo tout téja tonbé dakò pou batizé ti bèt-la, ansanm-ansanm, épi on Pastè alvantis osi.

Tousa ja akté an koulis, enpékab, san pété pon kab. Militè é mizisyen an fanfar ké la. Natirelman, la jandamri ké mété on dévyasyon anplas, pou vwati pa pasé fè dézòd, ni kraché polisyon asi krab2-la, ni asi lenj a sé envité-la jou-la sa, pa pè. Ké tini gwo-ka, mwayen-ka, ti-ka osi, tapou-dibas, gita, bal kadri, lakòdéon, é yonn-dé ti matalon.

On fé-dartifis djous prévu... sé silon si tan-la bel.

Natirelman, kay ni bon bwè é manjé an wonpwen-la. Bon dèkwa, adan mini-minui-la ! Bon ti matété a krab ki rann-nou solid konsa, bougo é chobèt, diri aransò, poupyé cho, ti-bébélé Granbou, piskèt 3-Rivyè, loti a pouli, kolonbo sirik, jid-kàn, kowosòl, kilibibi... tou sa ja a-létid.

Tou natirelman, sé on Gran Chef étwalé sòti jis an Frans, pa asi Kler-Monféran, sinon owa la Swis, ki ké rivé pa aviyon, an klas-afèr, èvè 12 zakolit a'y, espré pou ti manjé-la ot0P-Nivo. Chèf Kuizinyé Lokal ja mandé padon, pou vini gadé sa annékip é gouté titak adan, avan yo sèvi pon moun. Zélèv Lisé-Otèlyé bien-nélivé ké la, an tenu blé é blan, pou sèvi matété-la, asi gran fèy a bannann bien dézenfèkté é bégoné. Jid-gwozèy pijé si-plas ké koulé a-gogo... adan ti goblé an pach a kann biyo-dégradab, sil-vou-plèr !

Pa lapenn di, lé média ja konvoké, èvè fotograf, Hanibal, Canal+natal, télé-zéklè fondal, radio tanbou èfèm é konsò. É jou-la sa, yo ké ba lé 4 dènyé ansyen konbatan 14-18 ki toujou vivan, on pin's a krab-la, an lò-blan ! 

Foto a sé 4 pin's la adan teksto-la sa.

Mézofèt...

Èskè zòt anvi savé pouki yo pa té vlé envité Pap-Fanswa, èvè on bel mòdan a krab pann an kròs a golèt-péléren a'y ? 

Pou'y sizé épi la jénès atè-la an zèb-la, niché-dwèt é tété lang douvan on bon kalalou èvè yo, toupannan on bel kouté-konprann-tandé ka woulé-gaoulé ?...

Mééé wi... Sa sé on bon lidé !...

Ében... Pap-la ké la osi !!! Wi, Pap Fanswa an chèr é an zo, ké an won-pwen Gripon, pou lansman a Krab2-la ! I ké défilé doubout oka, adan vwati blendé papal personèl vèw a'y ! Foto a'y an ba tèksto-la. La Réjyon djous ké finansé tout afè-la sa, parapòt a enpak bénéfik vizit a Pap-la ké ni a Briksèl, é a LONU !

Alélouya !

Bénédiksyon di syèl san dyézel tonbé si péyi Mornalo é tout lépèp alantou ! O dènyé nouvel, dyèksyon a Mémorial mactE-la pa kontan ditou-ditou ! 

Yo té vlé krab-la pou yo tousèl... 

Apa jé, non.

Kouté Radio Malanga FM pou suiv sa. Yo ni bon tèknisyen, san piblisité.