Nos a quitats Catí, professora d’occitan e militanta del CRÈO Lengadòc

Marie-Catherine Dufour-Ndiaye, «Catí» per sos collègas, es defuntada après aver afrontat pendent qualques annadas una malautiá. Professora d’occitan dins l’ensenhament public, èra membre del conselh d’administracion del CRÈO Lengadòc e de la FÈLCO. Un omenatge li serà rendut diluns 5 d’octòbre a 16h00 a Valfaunés (Montpelhierenc), la comuna ont demorava. Lo CRÈO Lengadòc a fach saber que remetrà a la familha los messatges e los testimoniatges que li mandaràn. D’escriure a lengadoc(a)felco-creo.org.

Nascuda en Senegal, i parlava quatre lengas dempuèi l’enfança. Après una carrièra scientifica, amb una tèsi en biologia, s’inscriguèt en 2012 a l’Universitat Pau-Valèri de Montpelhièr per far d’estudis d’occitan. Segon Maria-Joana Verny, presidenta del CRÈO Lengadòc, mestregèt lèu la lenga, de la prosodia a las finesas de la sintaxi e del vocabulari.

En 2014, venguèt adjoncha al cònsol màger de Valflaunés. Aquel meteis an, se presentèt al CAPES d’occitan, qu’obtenguèt a la primièra plaça. Foguèt nomenada al licèu Enric IV de Besièrs, puèi a Lunèl. Aimada de sos escolans, bastiguèt de projèctes pedagogics e se sindiquèt a l’SNES.

La malautiá la tustèt en 2021. Al començament de 2026, sos collègas del CRÈO organizèron una collècta per li pagar de sesilhas de massatge. Dins son darrièr corrièr, los mercejèt per la descobèrta d’un mond que l’aviá acompanhada pendent gaireben quinze ans. Evoquèt tanben la «revelacion» qu’èra estat per ela lo mestièr d’ensenhaira en lenga d’òc.

Nos a quitats Catí, professora d’occitan e militanta del CRÈO Lengadòc | FÈLCO-CRÈO