« In domi-inbéssil lé pli danzéré k’in inbéssil konplé »

In kozman pou la rout

Médame zé Méssyé, la sossyté, koz èk mwin sé koz èk in kouyon, mé sé o pyé d’lo mir k’i oi lo vré masson.

Mézami la déza ariv azot ésplike in n’afèr in moune épi ké li aprouv au avèk la tète pou dir a ou : « Oui ! Oui ! konmsa mèm » é aprésa wi rotrouv out travaye an gran dézord, an ki-dsi tète. Mi pans zot la du dir : « I falé pa kroir boug-la, sansa èsplike ali konmsi li l’avé pa konprande inn tyork. »

I vo myé in inbésil konplé é k’lé kapab dir li konpran pa in grin, pars omoinss lé pa dir pou konprande ké li konpran pa. L’èr-la soi wi ronons èsplik ali. Soi wi ésplike ali sak li pé konprande. Soi in bon zélèv i fé avèk li. Mé antansyon, mové zélèv mové mètr i sava ansanb.

Alé ! Mi kite azot rofléshi la dsi é ni rotrouv pli d’van. Sipétadyé.

Justin