An sonmey té za ka chayé mwen yè-oswè ek man chonjé fok man té alé mété lérestan jigo-a adan frijidè-a.
Man pa limen limiè salon-an ek man pran direksion latjwizin-lan. Asou ladwet-mwen, man bien wè an dékorasion men man pa anmerdé kò-mwen. Mi anvwala man fè limiè latjwizin-lan ek dékorasion-an koumansé déplasé ek vini bò fidji-mwen. Abo an latranblad pran mwen, man anni kriyé ek man volé-séré an fon chamb-mwen. Kidonk, bidim zagriyen-an té ka sanm an dékorasion an fè-nwè a, men sé té bien an bidim zagriyen !
Aprésa, Alis vwazin-mwen kriyé mwen asou Watsap pas man lévé'y adan sonmey-li ek i konprann sé té tjek dorlis man té rivé-tjenbé lakay-mwen.
Man té wont di'y sa ki té fini rivé mwen an, men man rakonté li'y kanmenm.
I reponn mwen : " Mafi, érezdibonnè ou kriyé fò kon sa palakoz zagriyen-an. Kifè ou rivé tiré mwen adan an model vié rev man té la ka fè. Adan rev-tala, an bidim lapen blan ki té ni zié woz té ka di mwen kon sa : " Fout ou bel, madmoisel ! Es ou lé an kawot adan sé ta mwen-an ? "
Alis di mwen kon sa : "Chabin, man ka di'w mèsi, pas lapen-an mantjé pran mwen adan an welto ek man té key pri adan djendjen-tala pou lavi éternèl."
- Se connecter ou s'inscrire pour publier un commentaire
- 6 vues
Charles Scheel
30/06/2025 - 20:03
Jessica Pozzi ("Erudit")
29/06/2025 - 10:05
La Tribune des Antilles
29/06/2025 - 09:55
