Dé jou avan an pwan chimen pou ay an péyi a sé Tata Sonba la, mwen anvi rakonté-zòt on prèmyé vwayaj an té fè a Gorée (Sénégal) ja tini pasé dis lanné.
An toujou té vlé konnèt chimen-la sé prizonnyé nèg sòti an Lafrik pou yo rivé kotésit , an toujou té vlé konnèt chimen-la désèrten moun ka fè konnès a moun, té ka fè-yo pwan pou yo té vini èsklav an Lanmérik.
On granmadanm onjan mistik, èvè on bèl laj asi tèt a chivé blan a-y, on madanm té ka rété a Kabrit (sèksyon Chèlchè) Zabitan, lè an di-y poukisa an té k’ay anba-la i di-mwen :
« Ou k’ay anba-la chè, kouté, si ou k’ay la sé zansèt an-nou sòti la, pwan tibwen tè Gwadloup, koté kaz a-w, mété adan on bokal, menné-y anba-la, épi ay simé-y adan on senmityè, aprésa pwan tibwen tè anba-la adan menm bocal-la, é viré an Gwadloup èvè-y pou simé-y douvan pòt a kaz a-w ! Sé pou rékonsilyé sa i pasé yè èvè sa ka pasé jòdi. »
Sé sa an fè ! Mé kouté kijan sa pasé.
Kidonk, an té tini on fanmi Osénégal, i té envité-mwen vini, kifè an pwofité pou té ay a Goré. Lè ou Dakar, fo ou pwan on bato-lotobis-navèt pour ay asi lilèt Gorée. Lè an vwè lakantité touris asi bato-la k’ay pasé lajouné asi lilèt-lasa an té pou ja konpwann an té adan on biznès-touristik. Mé awa, an pa penga sa, mwen Sokrat, an té adan trip an mwen, an té vlé woufè chimen alanvè a dotwa sé gangann an-nou la.
Lanmè-la té bèl, rivé Gorée, syèl-la té bèl, an té vini pou dòmi adan on lotèl é déviré Dakar landèmen. An suiv guid-la èvè tou sé touris-la, an vizité lajòl-la, ola yo té ka fèmé chenné sé nèg-la, an rivé douvan sa yo kriyé « la porte du non-retour » ka bay asi lanmè-la, la yo té ka baké sé prizonnyé-la asi détwa ti-kannòt pou menné-yo asi sé gran bato-négriyé la.
Pannan tout visit-la , té tini moun ka kouté, ka palé, ka pozé gid-la kèksyon si kèksyon. Mwen an pa té sav poukisa, an té an boulvès, kè an-mwen té ka bat on kalenda anrajé, sitèlman fò, an jis kwè an té ké tonbé mal : an té kòlè, an té pè, an té wont, wont pou zansèt an-nou, wont pou limanité….
Jou-lasa, lè an viré an lotèl-la, mwen ay lonji kò an-mwen : an té ni lafyèv é frison, an té ka gligliyé. Yo mandé on dòktè vini vwè-mwen pou sav si a pa té maladi palidizm an té ni. An di-y kijan, pannan tout vizit-la, an té manjé on kòwné grenn baobab yo ka kriyé « pain de singe » ; machann ka vann sa bò chimen konsidi sé pistach. Doktè-la di-mwen grenn baobab tini onlo vitamin C é sé sa kifè on fè alèji, mé dèmen tout biten-la ké ay plibyen.Tout lannuit-la an pasé a Goré la, an pasé-y ka gligliyé k’on griv tranblèz ! Landèmen maten an té gyéri !
Mwen, an ka kwè sa i rivé-mwen la, sé sa yo ka kriyé on réYaksyon épijénétik konsidiré on koul loraj a on pakyèt santiman mélanjé. Si zòt pa konnèt ka yo ka kriyé chòk « épijénétik », chèché, zòt ké konpwann.
Détwa lanné apré an wou-déviré Goré, mé kou-lasa, an té kon sé lézòt touris-la. Ayen pa rivé-mwen.
Adan dé jou an kay pwan chimen OUIDAH adan péyi Bénen…èvè tibwen tè péyi Gwadloup.
Mizi an mizi an ké anba-la an ké rakonté-zòt ! Solèy !
- Se connecter ou s'inscrire pour publier un commentaire
- 257 vues
