Hommage à Sylviane Telchid

Kanmarad fanmi épi zanmi
Ni bon dé kèk tan kadav an mwen la san la
Nou toujou rété nou menm an nou

Jòdijou ayen pa chanjé
Bobèch a moun a zò  manké gaz
Flanm bésé ba
Limiyè an mwen étenn pou toudbon
Apa pou di an pa la évè zòt ankò
An janbé on ti-sèy-pòt
An bokanté chanm pou pran lasal
On koté ola zyé pa bouzwen vwè pou gadé
Kontiniyé sonjé mwen jòdi kon yè
Kontinyé nonmé non an mwen anman ban mwen
Nou bat san pè pou péyi an nou
Nou fouré chari an tè rèch pou kréyòl pa bousyè an ravin dlo-bwak
Nou maké liv kon dòt té ka téré ziyanm an bik sèk
Sé davwa sa té rèd
Sé davwa nou té wòs
Ki fè nou réisi fè kréyòl anbaké andidan lavi a grangrèk
Sé tousa nou fè an braskò san débandé
Ki fè zò la an kounan alantou a lèspri an mwen
An ka mandé lawonn gadé sa nou pa té ni tan fè
Pou dòt kontinyé triyé sik-lizin an sab cho
Jòdila apa on jou pou nou pléré kon venn koupé ka débòdé
Sé maré ren é chalviré tè-gras avan tan bout
Apa on jou ka fin avan sòlèy kouché
Sé jou pou nou mèt tèt ansanm é kolé zépòl
Pou doulè pran lavòl é monté kontré zépeng filé an tèt a filao…

Max Rippon    
Ba on gran-sè