Serge Letchimy, met-a-manyok la-CTM, pa konpè-nou mé...

   ...fann tjou'y san-manman tout lasent-jounen anlè sé rézo sosial la es sé an bon bagay ba nou ?

   Dabò-pou-yonn, fok fè moun chonjé ki nan lanné 2015, an sanblaj (coalition) dives parti politik yo ka kriyé Gran Sanblé té ba'y an dal (lourde défaite) : sanblaj-tala té genyen primié éleksion la-CTM épi 15.00 vwa an plis ki PPM ek sé alié'y la. 

   15.000 vwa sé pa an ti bagay ! Sa té lé di ki popilasion Matinik té boufi épi politik PPM lè i té ka dirijé Konsey réjional la. Tout moun ka chonjé ki landimen dal-tala, Serge Letchimy té pati-kité Matinik afos sa té red ba'y ek ni an moun ki té jis pwan foto'y pou té sa mété'y adjendjen lè i té ka batjé abò avion-an. 

   Kidonk sé Gran Sanblé ki koumansé gidonnen (diriger) nouvo kolektivité-a épi MIM, RDM, PCM, BATIR, PALIMA, CNCP, MARTINIQUE-ECOLOGIE plis an parti ladwet, POU BA PEYI-A AN CHANS éti met-a-manyok li té Yann Monplaisir. Anlo moun bliyé ki sé gras a parti-tala ki, adan dézienm lawonnn (tour) éleksion tala, PPM anni pwan lavol toubannman. Sé primié fwa adan listwè politik Matinik ki an sanblaj endépandantis, otonomis ek ékolojis té ka pwan pouvwè a.

    Lè sa fet, GRAN SANBLE POU BA PEYI-A AN CHANS débatjé Plato Wa, an bidim lespwa lévé atravè tout Matinik. Pres tout moun té konpwann ki épi an étjip kon sa sitiasion péyi-a té ké mofwazé (changer) ek i té ké pwan an lot larel. An lot larel ki ta PPM ki ka prétann kò'y "otonomis" dépi...1958 mé ki pa janmen fè an tjou-patat pou fè lidé lotonomi-a vansé di yon sel santimet. Wi, an bidim lespwa menm té tijé ! 

   Men, abo (malgré) 15.000 vwa-tala, laplipa Matinitjé pa té sav sa ki té adan lakòday-la (accord) GRAN SANBLE té siyen an épi POU BA PEYI-A AN CHANS. Lakòday-tala té piblik men kon nou tout la sav, nou pa djè enmen li. Oben sa ki pwan tan li'y té sitelman jwa ki yo pa menm rimatjé ki adan teks-la té ni an ti fraz ki té danjéré toubannman : fok té mété rivandikasion lendépandans-lan asou koté pannan tout mandati-a. PESONN PA PWAN TAN KATJILE ASOU SA ! Sel bagay tout moun ritjenn sé ki Matinik té ké pwan an lot balan, ki zafè lajan-jété-nan-razié a (gaspillage) té ké bout an fwa pou tout, ki anboché lafanmi oben konpè pa té ké ekzisté ankò, ki koripsion té ké fini. Ek sa vré ki adan lajwa laviktwè-a, chef sé diféran parti-a té sensè. Wi, yo té sensè ! 

   Men, ki sa ki fet pou sanblaj ta-la ped éleksion téritorial an 2021, bagay ki pèmet S. LETCHIMY riviré pwan pouvwè-a ? Sa ki pasé ? 

   Pies bilan poko janmen fet jik jòdi-jou abo dé sèten manm sanblaj-la té las mandé sa fet ! Konsidiré té ni moun ki té lé séré tjek bagay oben ki té pè yo mété zafè-yo déwò. Poutan, lè nou ka jété an zié asou mandati-a, ni ANLO BAGAY ki fet. Kontel (par exemple), démaraj TCSP-a ki té ka tadé-tadé-tadé lè zot wè PPM té o pouvwè. Kontel lin bato-a ki té ka lianné Kaz-Pilot épi Fodfwans, bagay ki té ka soulajé moun ka viv adan sé komin Nò-Karayib la ka désann travay Fodfwans davwè (parce que) yo té ka sibi anboutéyay dépi 5h-d-maten pou rivé jik 9h. Kontel ankò dévlopman kafé natif-natal (autochtone) Matinik épi an gran konpanyi kafé péyi Japon. Alfred Marie-Jeanne té dayè pou ay nan péyi-tala pou za prézanté'y lè sé Jé Olenpik la té ké ouvè. Malérezman, Kovid-19 la opozé (empêcher) sérémonni-a fet.

   Ki andan lapech, ki adan lagrikilti, ki adan aménajman téritwè-a kisasayésa... (etc...) anlo pwogré fet. Mèyè (peut-être) pli bel bagay ki fet sé dabò-pou-yonn, ridoubout sé finans la-CTM la pis lè GSPBAC (Gran Sanblé pou ba Péyi-a An Chans) rivé, i touvé an tou-lajan (déficit) pliziè dizenn milion éwo. Bouché tou-lajan tala pa té rédi chez bò tab ! Epi, pou primié fwa dépi lanné épi lanné, sé fournisè la-CTM té péyé adan an tan rézonnab aloski an tan PPM, fok yo té atann lanné-kannel (la Saint-Glinglin). 

   Kidonk mandati-tala té koumansé an manniè flouz. 

   Malérezman, ladjè vini pété ant sé manm sanblaj-la aloski yo té ka sanm sa ka antann kò-yo san pies kalté tjak (problème).

   Pli grav ankò, sèten konséyé téritorial prensipal parti GSPBAC la kivédi lè MIM koumansé ka vréyé pié, ka kritijé Marie-Jeanne jis tan yo kréyé pwop parti-yo !!! Nou pé ké dékatiyé (analyser) poutji pliziè ladjè vini pété ant sé dives parti-a pis, kon nou za di'y, pies bilan sérié asou sa poko fet, mé fok Matinitjé sav ki sé lo bililik initil tala ki, anfinaldikont, pèmet PPM ek S. Letchimy viré-pwan pouvwè-a la-CTM. Kidonk, lè atjelman, moun ka pasé tan-yo ka fann tjou'y bonmaten-an-midi-oswè, fok yo gadé fidji-yo titak adan an miwè. Fok yo admet ki sé fot-yo si PPM genyen éleksion 2021 an.

   Nou ka viré di'y : S. Letchimy pa konpè-nou pies toubannman, mé mété'y alafet, jouré manman'y, krititjé tou sa i ka fè, akizé'y di tout kalté model salopté (malversation) kisasayésa..., pa an bon bagay pies ba ti péyi Matinik la. Dayè, GSPBAC simen telman kouyon ki anni gadé sa ka fet jòdi-jou ? Dé sèten moun ki anni sòti nenpot koté, dé moun pèsonn pa té konnet, anni débatjé ek yo di kon sa ki tout parti politik ek sendika sé an bann initil ! Yo déklaré sé yo ek anni (seulement) yo ka riprézanté "pep-la". Sa ki pli red-la sé ki rivandikasion-yo ka rijwenn ta sé asimilasionis-la, ta ladwet la, ki nou té konpwann disparet té pwan'y an fwa pou tout. 

   PPM reskonsab sitiasion-tala mé GSPBAC reskonsab tou !